David García arrenuncia a la so acta de Conceyal


El nuesu Conceyal David García “Lete” presentó apocayá'l so arrenunciu a l'acta de conceyal por motivos personales llaborales según él mesmu esplicó nel Plenu Municipal celebráu ayeri, 28 de Noviembre.

La calidá y honradez personal del nuesu compañeru fixo qu'arrenuncie a un cargu al que David deseyaba dedicase al 100%. La so conceyalía incluyía les árees de xestión municipal d'Obres, Sableres, Deportes y Mocedá.  Les sos actuales circunstancies fixeron inevitable la so dimisión, dexando claro'l so respetu a la institución y a la ciudadanía de Carreño cola responsabilidá demostrada col so arrenunciu.

David ye una persona llana, dialogante, con un calter bonable y conciliador bien fayadizu pal cargu que desempeñó hasta'l momentu. Dexa nel Conceyu de Carreño una imaxe escelente, siempre sollerte a les necesidaes, moliciones y pidimientos vecinales. Tamién dexa buelga nel grupu municipal socialista siendo queríu y apreciáu tanto por conceyales d'esti gobiernu municipal como por compañeros y compañeres de corporación pertenecientes a les formaciones polítiques de la oposición, según espresaron bien acertadamente les distintes portavocías nel mesmu plenu.

Deseyámos-y muncha suerte a David na so vida profesional, ensin dulda la prioridá pa toes y toos, y que sepa'l nuesu queríu compañeru que siguimos cuntando con él y cola so inestimable ayuda.

La sustitución de Lete va producise nun próximu Plenu, siendo'l conceyal que sigue na llista de la candidatura socialista'l compañeru José Jesús Varela.