D'aprobase'l presupuestu municipal, teniendo en cuenta les restricciones del techu de gastu, no que queda d'añu, nel conceyu podríen encarase inversiones por un monto de más 474 mil euros.
Un presupuestu, el de 2020, que l'equipu de gobiernu define como bien necesariu y afechu a la realidá económica del conceyu.
Na comisión informativa de Facienda del Conceyu de Carreño, celebrada, el pasú vienres, treslladóse al restu de grupos políticos un últimu borrador de presupuestu pa 2020. Vienen trabayando nél dende Noviembre del añu pasáu.
“Izquierda Xunida y Somos Carreño tán asoraos y desnortiaos tres les últimes resultancies electorales. Nun les dixirieron y desgraciadamente la so acción política esta llexislatura amenórgase namá a atacar al gobiernu. Lleven dende l'añu pasáu diciendo públicamente que nun van sentase a axustar presupuestu, ensin antes conocer la lliquidación definitiva del añu 2019. Una escusa más. Conocen les lliquidaciones provisionales y saben perfectamente qu'esi datu final nun se tien afináu hasta'l 1 de marzu del añu siguiente. Nunca s'esperó a la lliquidación definitiva pa tener presupuestu. Los presupuestos apruébense muncho primeru. Tamién son dafechu conscientes que cuánto más se retrase l'aprobación del presupuestu peor pa Carreño, menos tiempu pa sacar a llicitar les obres, menos tiempu pa executar les obres y, a última hora, más problemes por que los proyectos salgan adelantre. Ponen costantemente palos na rueda col únicu fin de pretender foliar al gobiernu ensin pensar, en nengún momentu, nel vecinderu. Día tres día, enllénase-yos la boca falando de servicios públicos, pero nun contribúin a aprobar los presupuestos que los financien” – afirmó Paula Cuervo edil de Facienda.
“Pol bien de Carreño, nun vamos remacariar n'esfuerzos pa buscar consensos ente les distintes fuerces polítiques por bien distintes qu'éstes puedan ser. Ye fundamental sacar alantre un presupuestu municipal dempués de dos prórrogues presupuestaries” – señaló la Conceyala de Facienda.
“Nun hai qu'escaecer que'l Conceyu vien xestionándose con un presupuestu prorrogáu dende 2017. Esta situación dase pola falta d'alcuerdu políticu nestos dos últimos años. Nesta coxuntura faise bien difícil dar respuesta a les necesidaes vecinales. Xestionamos con más gastos y menos ingresos. Tolos grupos políticos tienen datos reales de gastos ya ingresos municipales, y supervisen toles factures” indicó Paula Cuervo.
“Dende'l postreru presupuestu aprobáu (2017) al Conceyu- como nes nueses cases - xubiéron-y los costos que tien qu'asumir. Amontóse'l capítulu de personal, cuesten más de los servicios que les empreses al conceyu empréstennos, la enerxía y los suministros tamién xubieron. Fixéronse nuevos contratos alministrativos - necesarios pal funcionamientu de los servicios públicos qu'ufiertamos– que suponen más gastos qu'hai qu'atender. Y amenorgaron los ingresos al aprobar baxar los impuestos al vecinderu” añedió la conceyala.
Nel casu del capítulu (personal municipal), les meyores salariales fueron aprobaes por tolos grupos políticos que tán representaos nel Conceyu.
“Si toles fuerces polítiques coincidimos, nestos últimos años, na necesidá d'ameyorar les condiciones llaborales del personal municipal y votamos favorablemente felicidaes ameyores dempués d'aldericales y axustales con sindicatos ¿cómo agora naide quier aprobar un presupuestu municipal pa reflexar debidamente esos gastos a los que toos comprometimos?. ¿Qué sentíu tien aprobar meyores económiques que dempués non se reflexen nel presupuestu? Asina, nesti escenariu de prórroga presupuestaria, van salir siempres lliquidaciones negatives. Esto perxudica a la ciudadanía y al funcionamientu del Conceyu yá que, a pesar de nun tener delda municipal, mientres se liquide en negativu nun vamos poder usar los millones del remanente de tesorería. Tenemos abondo dineru nos bancos ensin poder gastar hasta que se liquide en positivu y pa llogralo precísase afaer el presupuestu prorrogáu col que venimos trabayando al presupuestu real que precisa Carreño“ - afirmó la responsable de Facienda.
“Nestos últimos años, pol bloquéu políticu, venimos faciendo malabares p'afaer los gastos corrientes, faer inversiones que demanda'l vecinderu, caltener les actividaes municipales, y siguir collaborando coles entidaes deportives, de festexos y socioculturales. Amás, tener menos ingresos al rebaxar la presión fiscal. Tamos gobernando en presupuestos prorrogaos, ensin perxudicar con ello a los servicios públicos que s'empresten y teniendo qu'asumir costoses inversiones d'urxencia pa faer frente a daños d'envernaes y argayos, namá en Xivares na sienda 60.000 mil euros tuvimos qu'adelantrar.” – esplicó Paula.
“Que nun nos faigan perder más tiempu, nin dean más escuses probes, que la xente de Carreño votó entendimientu. Revalidaron l'enfotu nel PSOE siendo la llista más votada llogrando un conceyal más. Nun votaron nin confrontación nin bloquéu. Por tanto, dientro de la pluralidá política, nun van cumplir cola so responsabilidá los grupos políticos qu'aportunen en convertir la xestión municipal nun campu de batalla bloquiando l'avanzar nes inversiones y proyectos que saben que son bien necesarios” – atayó Cuervu.
La propuesta de presupuestu pa 2020 inclúi 474.000 euros pa inversiones. Siendo esta la máxima capacidá inversora posible, propúnxose-yos a los grupos políticos el distribuyir éstos cómo siguen, dexándo-yos 193.000 euros llibres, ensin afitar destín y a disposición de los grupos de la oposición entendiendo que pa sacar alantre les cuentes municipales col sofitu d'otres fuerces éstes lóxicamente van querer ver reflexaes nel presupuestu propuestes del so programa. A tal fin, dexóse una partida en blancu pa recoyer les prioridaes d'otros grupos políticos. Confiamos que nos próximos díes empiecen a concretar les sos propuestes reales.
Entrín y non, dende l'equipu de gobiernu vamos siguir trabayando na xestión diaria, en disposición de dialogar y axustar pa llograr que les cuentes sían aprobaes. Cuidao que les fuerces polítiques son conscientes de la realidá económica y de les necesidaes vecinales nun vamos dexar más escuses, como les recibíes mientres estos trés últimos meses, y nel mes de Marzu vamos alzar a Plenu un presupuestu.
Descontando esa partida en blancu p'atender a les prioridaes de los grupos políticos na oposición el restu propónse distribuyir asina:
165.000,00 euros pa caltenimientu de la rede viaria del conceyu.
30.000,00 euros pa meyores necesaries n'espacios d'ociu y víes urbanes de Candás.
20.000,00 euros pa instalaciones deportives y adecuación de colexos públicos.
57.000,00 euros pa inversiones medioambientales.
168.891,00 euros pa plan integral de la zona rural.
35.000,00 euros p'asistencies técniques que se precisen y que van redundar en más ingresos municipales.
Pretendemos poner en marcha nueves tases a empreses eléctriques y revisar la tasa 1,5%. La puesta en marcha de nueves tases riquen faer unos estudios técnicos ya inventarios previos que suponen unos gastos. Faelos va dexanos aprobar diches tases y cobrar a les empreses que faigan usu del dominiu públicu por tresporte d'eletricidá según l'usu privativu nel suelu, sosuelu y vuelu de les víes públiques municipales.
Cuervo aprofió que caltienen el so compromisu de diálogu y voluntá d'algamar alcuerdos con tolos grupos que tienen representación na Corporación carreñenese
“Somos conscientes qu'esi diálogu namá va poder fructificar n'alcuerdos con aquellos grupos que realmente quieran construyir y avanzar nel conceyu. Nun vamos entrar na negativa permanente na que s'instalaron dalgunos, que solo lleva una confrontación a cualquier preciu. Carreño merezse xestores municipales responsables que realmente quieran avanzar nes inversiones y proyectos que demanda'l vecinderu” - concluyó la conceyala.
